പുറകോട്ട് ഒരു യാത്ര പോകണം,ബാല്യത്തിലേക്ക്.തണുത്തുറഞ്ഞ നിലാവുപെയ്യുന്ന ആ രാത്രി അച്ഛന്റെ കയ്യില്‍ തൂങ്ങി കാവിലേക്ക് പോകണം.അവിടെ ഭയത്തോടെ ഞാന്‍ നോക്കിനിന്ന തെയ്യം മുഖത്തെഴുത്ത് ഇന്ന് അത്ഭുതത്തോടെ ആസ്വദിക്കണം.കൂട്ടുകാരുടെ കൂടെ ആലിന്റെ വേരുകളില്‍ ഊഞ്ഞാലാടണം.ബലൂണുകച്ചവടക്കാരന്റെ കണ്ണുവെട്ടിച്ച് ബലൂണ്‍ കല്ലെറിഞ്ഞ് പൊട്ടിക്കണം.അയാള്‍ കാണുമ്പോള്‍ ഓടി ആള്‍കൂട്ടത്തില്‍ മറയണം.ചെണ്ടയില്‍ കോലുവീഴുമ്പോഴുള്ള ഓരോ ശബ്‌ദവും ഒന്നുപോലും വിടാതെ ഇത്തവണ ഒപ്പിയെടുക്കണം.വീരന്‍തെയ്യത്തിന്റെ പുറകില്‍ ചങ്കുപൊട്ടും വരെ കൂകികൊണ്ട് ഓടണം.ഒടുവില്‍ അന്നുരാത്രി അച്ഛനേം കെട്ടിപിടിച്ച് ആലിന്‍ തറയില്‍ കിടന്നുറങ്ങുകയും വേണം.